აზია, მსოფლიოს უდიდესი და ყველაზე დასახლებული კონტინენტი, ბოლო ათწლეულების განმავლობაში ეკონომიკური და გეოპოლიტიკური გარდაქმნების კერაა. განვითარებადი ეკონომიკის აღზევებამ ღრმა გავლენა მოახდინა კონტინენტის განვითარებასა და მის ადგილზე გლობალურ მსოფლიო სურათზე.

აზიამ განიცადა დიდი ეკონომიკური ზრდა, რითაც რეგიონი ეკონომიკურ ძალად გარდაქმნა. ქვეყნები, როგორიცაა ჩინეთი, იაპონია, სამხრეთ კორეა და ინდოეთი, გამოჩნდნენ გლობალურ ვაჭრობაში და ინვესტიციებში მთავარ მოთამაშეებად. ამ ეკონომიკურმა ცვლილებებმა არა მხოლოდ გაზარდა ცხოვრების დონე, არამედ შეცვალა გეოპოლიტიკური დინამიკა, როგორც კონტინენტის შიგნით, აგრეთვე მის ფარგლებს გარეთ. გეოპოლიტიკურმა და ეკონომიკურმა ცვლილებებმა განაპირობა აზიაში ახალი ალიანსებისა და პარტნიორობის დამყარება. ორმხრივი და მრავალმხრივი შეთანხმებები, როგორიცაა ყოვლისმომცველი და პროგრესული შეთანხმება ტრანსწყნარი ოკეანის პარტნიორობისთვის (CPTPP).

აზიის განვითარებადი ეკონომიკური და გეოპოლიტიკური ლანდშაფტი აგრძელებს კონტინენტის ტრაექტორიის მნიშვნელოვან ფორმირებას. ხდება ეკონომიკური ძალების აღზევება და  გეოპოლიტიკური გადაჯგუფება, სადაც ჩინეთი ცდილობს გაძლიერებას, ხოლო საუდის არაბეთს სურს დამოუკიდებლობის წარმოჩენა, რისი თვალსაჩინო მაგალითიც იყო ირანთან კავშირების დამყარება.  რეგიონული ინტეგრაცია და ტექნოლოგიური წინსვლები დიდ ცვლილებებს იწვევს ეკონომიკური თვალსაზრისით და აგრეთვე, ახალ შესაძლებლობებს აჩენს ისეთი ქვეყნებისთვის, როგორიც საქართველოა.

ევროპისა და აზიის გზაჯვარედინზე მდებარე ქვეყანას ეძლევა ისტორიული უნიკალური შანსი, იყოს არა მხოლოდ გზაგამტარი, არამედ კარიბჭე. საქართველოს  აქვს შანსი გამოიყენოს ეს ისტორიული მომენტი და დაამყაროს ახალი ეკონომიკური და გეოპოლიტიკური კავშირები ისეთ ქვეყნებთან, როგორიცაა გალფის ქვეყნები: კატარი, საუდის არაბეთი, ქუვეითი, ბაჰრეინი, ომანი, არაბთა გაერთიანებული საამიროები და სხვა.

სტრატეგიული მდებარეობით უძველესი აბრეშუმის გზის გასწვრივ და კარგად განვითარებული ლოჯისტიკური ინფრასტრუქტურით, საქართველო შეიძლება გახდეს კარიბჭე აზიური საქონლის ევროპაში და პირიქით. სავაჭრო კავშირების გაძლიერება აზიურ ქვეყნებთან, განსაკუთრებით ჩინეთთან და ინდოეთთან, ხსნის გზებს გაზრდილი ექსპორტისთვის, პირდაპირი უცხოური ინვესტიციებისთვის და ეკონომიკური ზრდისთვის.

აზიის აქცენტი კავშირისა და ინფრასტრუქტურის განვითარებაზე ემთხვევა საქართველოს ინტერესებს, გააძლიეროს სატრანსპორტო და ენერგეტიკული ქსელები. ქვეყნის მონაწილეობა რეგიონულ ინიციატივებში, როგორიცაა აღმოსავლეთ-დასავლეთის სატრანსპორტო დერეფანი, იძლევა უცხოური ინვესტიციების მოზიდვისა და ძირითადი ინფრასტრუქტურული პროექტების განვითარების ხელშეწყობის შესაძლებლობას. გაუმჯობესებულ სატრანსპორტო კავშირებს შეუძლია გააძლიეროს საქართველოს ლოჯისტიკური სექტორი და შექმნას ვაჭრობისა და ტრანზიტის რეგიონული ცენტრი, მოიზიდოს ახალი ინვესტიციები და ახალი ეკონომიკური განვითარების შესაძლებლობები შექმნას ქვეყნისთვის.

ამ ყველაფრის მიღწევა კი შესაძლებელია გამარტივებული უვიზო მიმოსვლითა და თავისუფალი სავაჭრო შეთანხმებით ისეთ ქვეყნებთან როგორიცაა მაგალითად კატარი და ქუვეითი. აგრეთვე, დაარწმუნოს და მოიზიდოს ბაჰრეინი, ომანი და სხვები, რომ საქართველოსთან არსებული დიპლომატიური ურთიერთობები კიდევ უფრო გააღრმავონ და გაიხსნას მათი საელჩოები, რაც წინ გადადგმული ნაბიჯი იქნება შემდგომი ბიზნეს ურთიერთობებისა თუ ინვესტიციებისთვის.

რამდენადაც აზია მყარ პოზიციების იკავებს  მსოფლიო ეკონომიკურ ბაზარზე, საქართველოს სტრატეგიული მდებარეობა კიდევ უფრო დიდ მნიშვნელობას იძენს. ქვეყნის მონაწილეობა რეგიონულ ფორუმებში, უქმნის  პლატფორმას დიპლომატიური ჩართულობისა და აზიის ქვეყნებთან მჭიდრო კავშირებისთვის. საქართველოს როლი, როგორც ხიდი/კარიბჭე ევროპასა და აზიას შორის, აძლევს მას  სასიცოცხლო მნიშვნელობის მქონე მოთამაშის სტატუსს რეგიონული სტაბილურობისა და თანამშრომლობის გასაძლიერებლად.

14 ივნისს, აბუ დაბიში იმართება  ბიზნეს სამიტი (https://bit.ly/454hOQ6 ) , რომლის  ერთ-ერთი მთავარი მხარდამჭერი პარტნიორ ორგანიზაციებთან ერთად  არის აზიისა და სპარსეთის ყურის ქვეყნების ბიზნესპალატა (BCAGC), იგი გადამწყვეტ როლს ასრულებს ეკონომიკური თანამშრომლობის განვითარებაში, ტრანსსასაზღვრო პარტნიორობის ხელშეწყობასა და მდგრადი ზრდის სტიმულირებაში.

ბიზნეს ლიდერები, პოლიტიკის შემქმნელები და ინდუსტრიის ექსპერტები შეიკრიბებიან აბუ დაბიში ინდოეთისა და სპარსეთის ყურის ბიზნეს სამიტზე. ეს გამორჩეული ღონისძიება მიზნად ისახავს ინდოეთსა და სპარსეთის ყურის რეგიონს შორის უფრო მჭიდრო ეკონომიკური კავშირების ხელშეწყობას, თანამშრომლობას და ზრდის ბიზნეს განვითარების შესაძლებლობებს. ვინაიდან ინდოეთი და სპარსეთის ყურის ქვეყნები აგრძელებენ ორმხრივი ურთიერთობების გაძლიერებას, ეს სამიტი წარმოადგენს მთავარ პლატფორმას გამოწვევების გადასაჭრელად და გავლენიანი პარტნიორობის დასამყარებლად.

ეს ბიზნეს სამიტი იდეალურ გარემოს ქმნის ინდოეთის და სპარსეთის ყურის ქვეყნებისთვის, რათა ჩაერთონ შინაარსობრივ დისკუსიებში და გამოიკვლიონ გზები ეკონომიკური თანამშრომლობის გაზრდისთვის. სპარსეთის ყურის რეგიონი დიდი ხანია ინდოეთის სასიცოცხლო სავაჭრო პარტნიორია, ორმხრივი ვაჭრობისა და ინვესტიციების ნაკადები წლების განმავლობაში სტაბილურად იზრდება. ეს სამიტი იძლევა ამ კავშირების შემდგომი გაძლიერებისა და ვაჭრობის დივერსიფიკაციის შესაძლებლობას ენერგეტიკისა და ინფრასტრუქტურის ტრადიციული სექტორების მიღმა. სამიტის მონაწილეებს ექნებათ შესაძლებლობა, დაუკავშირდნენ ძირითად დაინტერესებულ მხარეებს და მიიღონ ინფორმაცია ბაზრის ტენდენციების, მარეგულირებელი ჩარჩოებისა და საინვესტიციო გარემოს შესახებ.

აგრეთვე, საუდის არაბეთი კერძოდ კი, ელ-რიადი 11 და 12 ივნისს უმასპინძლებს მნიშვნელოვან ბიზნესს სამიტს, რომლის მონაწილეც არის აზიისა და სპარსეთის ყურის ქვეყნების ბიზნესპალატა სხვა წამყვან ბიზნეს გაერთიანებებთან ერთად . არაბული ქვეყნებისა და ჩინეთის ბიზნეს ლიდერები შეიკრიბებიან ბიზნეს სამიტზე. ორდღიანი სამიტი მიზნად ისახავს ეკონომიკური კავშირების გაძლიერებას, თანამშრომლობის გაღრმავებას და ზრდის ახალი შესაძლებლობების აღმოჩენის ალბათობას, არა მხოლოდ არაბული ქვეყნებისა და ჩინეთისთვის, არამედ სხვა ქვეყნებისთვისაც. საუდის არაბეთში ჩატარებული ეს  ღონისძიება იქნება  მნიშვნელოვანი ნაბიჯი ქვეყნებს შორის ხანგრძლივი და ნაყოფიერი  ურთიერთობის გაღრმავებისკენ.

მსგავსი ტიპის ბიზნეს სამიტები ქმნიან პლატფორმას ცოდნის გაზიარებისთვის, ხელს უწყობენ თანამშრომლობის და პარტნიორობის შესაძლებლობებს.  საქართველოში ამის თვალსაჩინო მაგალითია 2017 და 2019 წლებში ჩატარებული აბრეშუმის გზის ბიზნეს სამიტები. ამ სამიტებმა კიდევ უფრო კარგად წარმოაჩინა საქართველოს როლი, როგორც დამაკავშირებელი ხიდი ევროპასა და აზიას შორის. საქართველოს გეოპოლიტიკური მდებარეობა და თავისუფალი ეკონომუკური ურთიერთობები  ევროპასთან აზიისთვის და გალფის ქვეყნებისთვის ქმნის უნიკალურ შესაძლებლობას აითვისოს ახალი ეკონომიკური ბაზარი და აწარმოოს სავაჭრო ურთიერთობები. ამისთვის საჭიროა გაერთიანდნენ ინდუსტრიის ლიდერები, მეწარმეები, მთავრობის წარმომადგენლები და დაინტერესებული მხარეები სხვადასხვა სექტორიდან თუ რეგიონიდან.

ამ მიზნით აზიისა და სპარსეთის ყურის ქვეყნების ბიზნეს პალატასა და პარტნიორ ორგანიზაციებს მიზანშეწონილად  მიაჩნიათ მიმდინარე წელს ჩატარდეს მსგავსი ღონისძიება საქართველოში, კერძოდ თბილისში, საქართველო და  გალფის ქვეყნები. სადაც გაერთიანდება ყველა დაინტერესებული მხარე, იქნება ეს დიპლომატიური კორპუსი, ხელისუფლება, თუ ბიზნეს ორგანიზაციები.  საჯარო და კერძო სექტორის გაერთიანებით საქართველოს არამარტო რეგიონში, არამედ გალფის ქვეყნების მიმართულებით ეძლევა ახალი კონტაქტები.

ბიზნესპალატის მთავარი მიზანი საქართველოში არის ეკონომიკური თანამშრომლობის ხელშეწყობა საქართველოს, აზიასა და სპარსეთის ყურის ქვეყნების შორის ბიზნესმენების, პოლიტიკის შემქმნელების და ინდუსტრიის ექსპერტების ერთმანეთთან დაკავშირებით, რათა მოხდეს  ცოდნის გაზიარება და პოტენციური ბიზნეს შესაძლებლობების გამოკვლევა. პარტნიორობის ქსელის მეშვეობით, იგი ხელს უწყობს სავაჭრო მისიებს, ბიზნეს დელეგაციებს და ინდუსტრიის ფორუმებს, რაც თავის მხრივ აჩენს ახალ შესაძლებლობებს. იგი მიზნად ისახავს ორმხრივად მომგებიანი ურთიერთობების განვითარებას, ეკონომიკურ ზრდას და კეთილდღეობას.

საქართველოს კი თავისი სტრატეგიული მდებარეობით, ძლიერი ინფრასტრუქტურითა და კულტურით აქვს შესაძლებლობა გახდეს მნიშვნელოვანი მოთამაშე ვაჭრობის ხელშეწყობაში, ტურიზმის პოპულარიზაციაში, განახლებადი ენერგიის განვითარებაში და საგანმანათლებლო და კულტურული გაცვლის ხელშეწყობაში. როდესაც საქართველო იწყებს ამ მოგზაურობას, აზიასთან პროაქტიულმა ჩართულობამ შეიძლება გახსნას ახალი ჰორიზონტები და ხელი შეუწყოს ქვეყნის მდგრად განვითარებას და ახალი უცხოური ინვესტიციების შემოდინებას.

ავტორი: დავით ცირდავა